ПАЧАЛАСЯ РЭСТАЎРАЦЫЯ БРАЦКАЙ МАГІЛЫ
Сродкі ў памеры 865 млн. рублёў, якія паступілі ў райбюджэт ад правядзення сёлетняга рэспубліканскага суботніка, накіраваны на рэканструкцыю помніка «Брацкая магіла. Вайсковае пахаванне № 3715», што на цэнтральных гарадскіх могілках. Работамі займаецца Хойніцкая ПМК. На мінулым тыдні будаўнікі прыступілі да дэмантажу старога пакрыцця каля пастамента помніка. Знята старая агароджа, замест яе ўстановяць новую. Рэканструкцыя прадугледжвае і новаўвядзенні. Так, згодна з распрацаваным планам каля помніка будзе ліхтарнае асвятленне, а вакол мемарыяла высадзяць дэкаратыўныя дрэвы. Поўная рэканструкцыя помніка ўключае аднаўленне самой скульптуры. Па словах галоўнага інжынера ПМК В.С. Калацэя, усе работы плануецца завяршыць да важнай даты – Дня вызвалення Хойніцкага раёна ад нямецка-фашысцкіх захопнікаў.
ЗААСФАЛЬТАВАНА ПЕШАХОДНАЯ ДАРОЖКА АД «ГАРАНТА» ДА ГІМНАЗІІ г. ХОЙНІКІ
Не адзін год існавала праблема ў мікрараёне «Юбілейны» з асфальтаваннем пешаходнай дарожкі па вуліцы Лермантава. Нарэшце яна вырашана. Як і абяцаў старшыня райвыканкама А.І. Ціток у сваім выступленні ў раённай газеце напярэдадні Дня горада, які шырока святкаваўся 29 жніўня, тратуар гэты прыведзены ў парадак. Асфальтаванне больш чым на 1000 квадратных метраў за бюджэтныя сродкі раёна выканалі работнікі мясцовага ДРБУ-155. Цяпер усім раздолле – пешаходам, маці з каляскамі, веласіпедыстам, дзецям, якія катаюцца на роліках.
ПРЫВОДЗІЦЦА Ў ПАРАДАК БУДЫНАК І ТЭРЫТОРЫЯ КАМБІКОРМАВАГА ЗАВОДА
Маштабны рамонт праводзіцца на ўчастку па вытворчасці камбікармоў. За летні перыяд адпаведныя работы праведзены ў кабінетах, санпрапускніку, пакоі для прыёму ежы. На самім адміністрацыйным будынку новы дах з металапрофілю, заменены вокны, завяршаецца абшыўка сайдынгам. Пры ўездзе на тэрыторыю ўстроены новы дэзінфекцыйны бар’ер, больш кампактная цяпер і эстакада для аўтамабіляў. У кацельні ўжо новыя катлы, цеплатраса пакладзена пад зямлёй (раней яна ішла на паверхні). Адначасова праводзяцца работы па асфальтаванню. Хутка ўстановяць на будынку новую вывеску даўжынёй пад 10 метраў. У ходзе работ ужо асвоена больш чым 600 мільёнаў рублёў галаўной арганізацыі – саўгаса-камбіната «Зара». Дарэчы, працуе і яе будаўнічая брыгада.
ЗАВЕРШАНЫ БЯГУЧЫ РАМОНТ СПАРТЫЎНАЙ ЗАЛЫ Ў ЦЭНТРЫ КУЛЬТУРЫ г. ХОЙНІКІ
Зараз спартсмены могуць праводзіць трэніроўкі ў адноўленым памяшканні: на гэтым тыдні завяршыўся рамонт спартыўнай залы па вул. Калесніка, 13, што ў гарадскім цэнтры культуры. На сродкі ДЮСШ Хойніцкага раёна і ўпраўлення спорту і турызму Гомельскага аблвыканкама зрабілі частковы рамонт даху, пафарбавалі сцены, аднавілі ганак і патынкавалі фасад будынка. У новым сезоне станоўчыя змены закранулі і фізкультурна-аздараўленчы комплекс, што ў гарадскім парку. Там таксама прывялі ў парадак вонкавыя сцены, пафарбавалі трэнажорную залу і аднавілі агароджу.
НАБЫТЫ СУЧАСНЫ КАТЭР ДЛЯ ПАТРУЛЯВАННЯ НА ВАДЗЕ
Сродкі, прадугледжаныя бюджэтам Саюзнай дзяржавы, у Палескім дзяржаўным радыяцыйна-экалагічным запаведніку накіравалі на набыццё новага катэра «Мастер-500» коштам 319 мільёнаў рублёў. Гэты плывучы сродак будуць выкарыстоўваць работнікі сектара аховы аддзела лясной гаспадаркі і аховы запаведніка. Новы катэр прызначаны для патрулявання на вадзе на тэрыторыі Хойніцкага, Брагінскага і Нараўлянскага раёнаў у час рэйдаў па барацьбе з браканьерствам. Катэр здольны развіваць максімальную хуткасць да 80 км у гадзіну.
НА ФЕРМЕ ЎСТАНОЎЛЕНА ПРАЛЬНАЯ МАШЫНА
У сельгаспрадпрыемстве «Велікаборскі» ўсямерна стараюцца стварыць належныя ўмовы працы для сваіх работнікаў. Тут набыта за ўласныя сродкі і ўстаноўлена ў бытавым пакоі малочна-таварнага комплексу пральная машына «Атлант» айчыннай вытворчасці коштам 4 мільёны рублёў. Жывёлаводы раней мылі спецадзенне дома, а цяпер гэта значна спрасцілася. Да таго ж, не ўручную адбываецца і мыццё салфетак, якія патрэбны пры падрыхтоўцы кароў да даення. 8 мільёнаў рублёў выдзелена на закупку двух воданагравальнікаў, якія ўстаноўлены на комплексе і ў сталовай гаспадаркі. Спецыяліст па ідэалагічнай рабоце КСУП «Велікаборскі» В.В. Кузьменка адзначыла і той факт, што ўсе работнікі поўнасцю забеспячэны спецадзеннем, якое пашыта на мясцовай фабрыцы мастацкіх вырабаў, аплата за гэта праводзілася па ўзаемазаліку.
Навіны збіралі Клаўдзія БОСАК, Ірына ЛУКАШЭНКА, Алеся ЯЧЫЧЭНКА.