Тэхнічнае абслугоўванне жылога дома ўключае затраты падрадных арганізацый па бягучаму ўтрыманню жылых дамоў і прыдамавых тэрыторый (бягучая эксплуатацыя і рамонт агульнай маёмасці жылых дамоў, уборка і асвятленне дапаможных памяшканняў, прыдамавой тэрыторыі). Утрыманне прыдамавой тэрыторыі ўключае работы па ўборцы смецця, снегу, рамонт удасканаленага пакрыцця праездаў, праходаў, догляд за зялёнымі насаджэннямі і інш.
У адрас нашага прадпрыемства часта прыходзяць звароты грамадзян, якія пражываюць у аднапавярховых жылых дамах дзяржаўнай формы ўласнасці, па пытанню зняцця ім аплаты за тэхнічнае абслугоўванне жылых дамоў. Асабліва гэта хвалюе сельскае насельніцтва.
Неабходна адзначыць, што рашэннем райвыканкома № 807 ад 12.06.2006 г. “Хойніцкаму камунальніку” дазволена знізіць памер платы за тэхнічнае абслугоўванне жылых памяшканняў, у якіх адсутнічаюць халоднае і гарачае водазабеспячэнне, каналізацыя і цэнтральнае ацяпленне, на 10 працэнтаў за кожны такі від інжынернага абустройства, у агульным не больш чым на 40 працэнтаў.
Часта даводзіцца сутыкацца з такімі сітуацыямі, калі грамадзяне адмаўляюцца аплачваць паслугі па тэхабслугоўванню домаўладанняў, аргументуючы гэта тым, што выконваюць усе работы самі. Аднак у адпаведнасці з Правіламі карыстання жылымі памяшканнямі, утрымання жылых і дапаможных памяшканняў жылога дома ў Рэспубліцы Беларусь наймальнікі, уласнікі жылых памяшканняў, члены арганізацыі грамадзян-забудоўшчыкаў абавязаны праводзіць за кошт уласных сродкаў самастойна або сіламі жыллёва-эксплуатацыйнай або іншых арганізацый (платная паслуга):
– рамонт займаемага жылога памяшкання (тынкаванне, пабелка, фарбаванне і аклейванне шпалерамі сцен, столі, дзвярэй, падлогі, падаконнікаў, аконных пераплётаў з унутранага боку, радыятараў, устаноўка шкла, замена падлогі, акон і дзвярэй і іх уцяпленне);
– рамонт і замену зношанага і выйшаўшага са строю ўнутрыкватэрнага абсталявання і падводку да яго: санітарна-тэхнічнага (ванна, унітаз, змыўны бачок, змяшальнік мыйкі і ванны, умывальнік, прыборы ўліку гарачай і халоднай вады, цеплавой энергіі); электрычнага (прыборы ўліку, пліта, праводка, выцяжны электравентылятар) і інш.
Толькі ў тым выпадку, калі выкананне ўказаных работ выклікана няспраўнасцю асобных канструктыўных элементаў і інжынерных сістэм жылога дома, то яны выконваюцца за кошт наймадаўцы або жыллёва-эксплуатацыйнай арганізацыі (у нашым выпадку КЖУП “Хойніцкі камунальнік”).
Нягледзячы на адсутнасць агульнай маёмасці, характэрнай для шматкватэрных жылых дамоў (міжкватэрных лесвічных пляцовак, лесвіц, калідораў, тэхнічных склепаў, інжынернага абсталявання), у аднакватэрных жылых дамах сядзібнага тыпу абслугоўваючая жыллёва-эксплуатацыйная арганізацыя нясе расходы, звязаныя з эксплуатацыяй інжынерных сістэм (планавыя і пазачарговыя агляды з састаўленнем актаў), прапіскай і выпіскай грамадзян, вядзеннем асабовых рахункаў, налічэннем платы за жыллёва-камунальныя паслугі, абслугоўваннем уводных устройстваў электра- і водазабеспячэння, ацяплення і іншых работ (у тым ліку аварыйнага характару).
Улічваючы вышэйсказанае, наймальнікі аднакватэрных жылых дамоў сядзібнага тыпу, якія знаходзяцца на абслугоўванні жыллёва-эксплуатацыйнай арганізацыі, абавязаны штомесяц удзельнічаць у фінансаванні затрат па фактычных расходах, звязаных з эксплуатацыяй і рамонтам канструктыўных элементаў, інжынерных сістэм жылога дома, утрыманнем прыдамавой тэрыторыі, а таксама рабіць адлічэнні на капітальны рамонт дома.
А. ВОЛЧЭК,
начальнік разлікова-даведачнага цэнтра КЖУП “Хойніцкі камунальнік”.
