22 чэрвеня ў Беларусі адзначаўся Дзень усенароднай памяці ахвяр Вялікай Айчыннай вайны.
У нашым горадзе мітынг-рэквіем адбыўся каля Каменя-помніка масавых расстрэлаў мірных жыхароў. Адкрыла і вяла яго першы сакратар райкома БРСМ Л.А. Гаркуша. Перад прысутнымі – ветэранамі, прадстаўнікамі працоўных калектываў, працуючай моладдзю і актывістамі ГА “БРСМ” выступілі намеснік старшыні райвыканкома В.М. Шаўчэнка, старшыня прэзідыума раённага савета ветэранаў М.С. Скрыпчанка, начальнік аддзела па справах моладзі райвыканкома І.С. Панчанка, настаяцель Свята-Пакроўскай царквы, протаіерэй Уладзімір Козак.
27 ударамі царкоўнага звону аб загінуўшых 27 мільёнах у Вялікай Айчыннай вайне і журботным маўчаннем аддадзена даніна памяці воінам, якія загінулі за наш сённяшні светлы дзень, замучаным у фашысцкіх канцлагерах, нявінна расстраляным, закатаваным, спаленым мірным жыхарам. Прысутныя ўсклалі вянок і кветкі да Каменя-помніка.
З 21 па 28 чэрвеня ў працоўных калектывах прадпрыемстваў, арганізацый і ўстаноў праходзяць інфармацыйныя гадзіны, прымеркаваныя Дню усенароднай памяці ахвяр Вялікай Айчыннай вайны, ва ўстановах культуры, бібліятэках аформлены кніжныя выстаўкі, праводзяцца тэматычныя вечары, гутаркі, прысвечаныя жалобнай даце.
Фота Уладзіміра СЯМЕНАВА.