Першы чэрвеньскі дзень для рабят з гарадскіх дзіцячых садкоў і школ прайшоў ярка і радасна на святкаванні Міжнароднага дня абароны дзяцей. Для іх арганізавалі ўсемагчымыя конкурсы і гульні на адкрытай пляцоўцы каля цэнтра культуры г. Хойнікі пад назвай “Вось яно якое – наша лета!”.
Для тых, хто пакуль не знайшоў сабе занятак на канікулы ці наступны навучальны год, майстар-класы прапанавалі аб’яднанні па інтарэсах пры гарадскім ЦТДіМ – маляванне, квілінг, арыгамі, вышыванне…
Урокі пад адкрытым небам праводзілі і трэнеры СДЮШАР – напрыклад, можна было ўбачыць, як на татамі спаборнічаюць юныя дзюдаісты. Каму па густу спартыўныя заняткі, змог паўдзельнічаць у эстафетах і дартсе.
Рабят прываблівалі цікавымі і карыснымі гульнямі не толькі юныя артысты тэатральнага гуртка “Гарэзы” пад кіраўніцтвам Н.М. Раманенка, але і прадстаўнікі розных арганізацый – Дзяржаўтаінспекцыі, райаддзела па надзвычайных сітуацыях, раённай арганізацыі Беларускага Таварыства Чырвонага Крыжа.
Так, выратавальнікі зацікавілі рабят выстаўкай пажарнай тэхнікі, дзе курсанты Гомельскага машынабудаўнічага каледжа прадэманстравалі, як падаецца вада ў выпадку пажару.
Інспектар групы прапаганды і ўзаемадзеяння з грамадскасцю РАНС А.А. Бяспалы правёў для хлопчыкаў і дзяўчынак віктарыну ў рамках акцыі “Не пакідайце дзяцей адных!”, самым цікаўным дазволілі апрануць баявое адзенне і пасядзець у пажарнай машыне.
Алеся ЯЧЫЧЭНКА.
