На тэрыторыі раёна, пачынаючы з чэрвеня, назіраецца рост захворваемасці на сальманелёз. Летась з пачатку года было зарэгістравана 6 выпадкаў захворвання, сёлета – 9.
Пры апытанні захварэўшых на гэтую вострую кішэчную інфекцыю ўстаноўлена, што большасць заразіліся ёю пры ўжыванні дамашніх курыных яек у сырым выглядзе. Можна таксама захварэць пры недастатковым прасмажванні, праварванні мяса птушкі. Бацькі могуць заразіць дзіця пры незахаванні правіл асабістай гігіены пры кармленні і доглядзе.
У летні перыяд, каб пазбегнуць сальманелёзу, трэба ўдзяліць увагу простым мерам прафілактыкі:
не варта ўжываць яйкі ў сырым выглядзе, а ў “крутую”, пракіпяціўшы не менш 10 мінут, аматарам яечні – прасмажваць з двух бакоў;
гатовую ежу і сырыя прадукты захоўваць раздзельна, выкарыстоўваць асобныя раздзелачныя дошкі для сырых і вараных прадуктаў, пасля заканчэння работы дошку і нож старанна вымыць з выкарыстаннем мыючых сродкаў;
прадукты, якія хутка псуюцца, салаты, у прыватнасці, трэба гатаваць толькі ў колькасці, неабходнай для аднаразовага ўжывання і ні ў якім разе не пакідаць назаўтра;
для піцця ўжываць бутыліраваную ваду, асцярожна абыходзіцца з прахаладжальнымі напіткамі;
пры штучным выкормліванні дзяцей абавязкова кіпяціць або апарваць бутэлечкі і соскі;
захоўваць тэрміны рэалізацыі і тэмпературны рэжым прадуктаў, якія хутка псуюцца (малака, мяса, каўбас, рыбы);
старанна мыйце рукі з мылам перад прыгатаваннем і прыёмам ежы, пасля прыходу дамоў з вуліцы і наведвання туалета.
Н. ЛАГВІНЕЦ,
галоўны дзяржаўны санітарны ўрач раёна.