14 красавіка ў райвыканкаме праведзена «прамая лінія» з удзелам кіраўніка раёна А.В. Бічана. Актуальныя тэмы размовы – будаўніцтва жылля, навядзенне парадку на зямлі, вядзенне падсобнай гаспадаркі.
Званілі неабыякавыя жыхары: былі паведамленні аб крадзяжы малака на ферме ў Клівах. Указаны канкрэтныя прозвішчы. Па гэтых фактах будзе праведзена праверка.
Жыхар горада Я.П. Яраш прасіў стварыць у сярэдняй школе № 3 або на базе гімназіі г. Хойнікі шахматна-шашачны клуб, прапанову адразу падтрымаў кіраўнік раёна. Вольны час трэба праводзіць з карысцю, каб рукі не цягнуліся сапсаваць што-небудзь, зламаць, каб не было жадання затуманіць свядомасць спіртнымі напіткамі.
У рамках месячніка па добраўпарадкаванню, аб’яўленага ў раёне, жыхары ўзяліся актыўна наводзіць санітарны парадак. Але ж што робяць некаторыя? Вызваляюць ад смецця ўласны падворак і выкідваюць яго за сваю агароджу. Аб такой безгаспадарчасці паведамілі з Вялікага Бору. Суседзі ж усё бачаць. Па-першае, аб якой культуры можа ісці размова ў гэтым выпадку? Як можна людзьмі звацца, калі пад носам чалавек шык-бляск навядзе, а выйдзе на вуліцу і будзе любавацца і ўдыхаць пахі ачага антысанітарыі. Такую свядомасць наўрад ці і штрафы змогуць выправіць.
Вуліцу Спартыўную горада пры неабходнасці прагрэйдзіруе камунальная служба. А вось навесці парадак на зямельных участках, якія тут знаходзяцца ў арэндзе, справа іх гаспадароў. Зямля родзіць ураджай, але пры гэтым чакае належнай увагі і догляду. Ад яе трэба не толькі браць, але і плаціць сторыцай.
Ірына ВАСІЛЬЕВА.