Хроніка чарнобыльскіх падзей 1986-га

26 красавіка, 1 гадзіна 23 мінуты –

на 4-м энергаблоку Чарнобыльскай атамнай станцыі адбылася аварыя, якая суправаджалася двума выбухамі, якія разбурылі актыўную зону рэактара і выклікалі пажар, які працягваўся каля 10 дзён. Выбух і пажар прывялі да выкіду вялікага аб’ёму радыеактыўных рэчываў у навакольнае асяроддзе. Выкід радыеактыўнасці ў 100 разоў перавышаў аналагічны паказчык пасля выбуху дзвюх атамных бомб, скінутых на Хірасіму і Нагасакі.

 

26 красавіка, 19.00 –

у г. Прыпяць (Украіна) прыбыла Урадавая камісія. Старшынёй яе назначаны Б. Шчарбіна.

 

27 красавіка, 5.00 –

для назірання за радыяцыйнай абстаноўкай на тэрыторыі Гомельскай вобласці разгорнуты 62 пасты радыяцыйна-хімічнага назірання.

 

27 красавіка, 12.00 –

пачата эвакуацыя г. Прыпяць. За 3 гадзіны было эвакуіравана 45 тысяч жыхароў.

 

29 красавіка –

на тэрыторыі Гомельскай вобласці разгорнуты 664 пасты радыяцыйна-хімічнага кантролю. Да гэтай работы былі падключаны 28 санэпідстанцый, 21 ветбаклабараторыя, 9 гідраметэастанцый. Вымярэнні праводзіліся праз кожныя 2 гадзіны.

 

30 красавіка –

у Хойніцкі, Брагінскі, Нараўлянскі раёны накіраваны 15 адказных работнікаў ад штаба ГА вобласці, аддзела аховы здароўя, УУС аблвыканкама, аблаграпрама і аблспажыўсаюза;

сіламі медыцынскай службы пачата суцэльнае лабараторнае даследаванне насельніцтва, для чаго было сфарміравана 29 рухомых брыгад для забору крыві.

 

1 мая –

у Хойніках адбылося пасяджэнне штаба грамадзянскай абароны, на якім было прынята рашэнне аб эвакуацыі жыхароў некаторых вёсак.

 

1-3 мая –

для аператыўнага кіраўніцтва работамі па ліквідацыі наступстваў аварыі на ЧАЭС на тэрыторыі вобласці была створана рабочая група ў колькасці 13 чалавек пад старшынствам першага намесніка старшыні аблвыканкама А. Шахновіча. Месцам знаходжання рабочай групы вызначаны г. Хойнікі;

спынены палявыя работы ў калгасах «Першае мая» і «Новае жыццё» Хойніцкага раёна;

праведзена герметызацыя жывёлагадоўчых і складскіх памяшканняў, гароднінасховішч ва ўсіх гаспадарках пацярпеўшых раёнаў.

 

3 мая –

разгорнуты работы па спецыяльнай апрацоўцы транспарту і грузаў на аўтамабільных дарогах у вёсках Савічы, Дронькі, Пешкаў, Глінішча сіламі воінскіх часцей і фарміраванняў ГА, жылкамунгаса і УУС;

быў створаны рэспубліканскі штаб грамадзянскай абароны.

 

4 мая –

у Беларусі створана камісія па ліквідацыі наступстваў аварыі на Чарнобыльскай АЭС.

 

5 мая –

пачаты суцэльны дазіметрычны кантроль гама-фона на шчытападобнай залозе насельніцтва пацярпеўшых раёнаў.Дазіметрычнаму кантролю падвергнута ўсё насельніцтва Хойніцкага, Брагінскага і Нараўлянскага раёнаў;

закончана эвакуацыя насельніцтва з 50 населеных пунктаў Гомельскай вобласці. Усяго было эвакуіравана 18,3 тысячы чалавек. Першы этап эвакуацыі.

 

14 мая –

зварот па тэлебачанні да народа Прэзідэнта СССР М.С. Гарбачова. Пасля аварыі прайшло 18 сутак.

 

2-9 чэрвеня –

дадаткова адселена насельніцтва і вывезена пагалоўе жывёлы з 28 населеных пунктаў. Эвакуіравана 8,9 тысячы чалавек, 37 тысяч галоў жывёлы.

 

10 чэрвеня –

колькасць эвакуіраваных дасягнула 18,7 тысячы чалавек.

 

Чэрвень –

у Хойніцкі, Брагінскі, Нараўлянскі раёны накіраваны аператыўныя групы ў колькасці 41 чалавека для аказання райвыканкамам дапамогі на месцах у правядзенні эвакуацыі насельніцтва;

для кіраўніцтва работай па вывазу матэрыяльных каштоўнасцей дзяржаўных і грамадскіх арганізацый і ацэнцы маёмасці грамадзян створаны абласная камісія і 2 рабочыя групы;

на ўсіх складах, базах і харчовых прадпрыемствах створаны дазіметрычныя пасты для кантролю за забруджваннем радыеактыўнымі рэчывамі транспарту, прыбыўшага пад пагрузку.

 

1 ліпеня –

закончана санітарная апрацоўка 485 населеных пунктаў, якія падвергліся радыеактыўнаму забруджванню. У работах прыняло ўдзел больш за 130 тысяч чалавек.

 

Жнівень –

закончана эвакуацыя насельніцтва са 107 населеных пунктаў Гомельскай вобласці, якія падвергліся радыеактыўнаму забруджванню. Было эвакуіравана 24,7 тысячы чалавек і каля 50 тысяч галоў жывёлы.

 

1 верасня –

закончана дэзактывацыя 125 будынкаў школ і 94 дзіцячых дашкольных устаноў і іх тэрыторый з адначасовым добраўпарадкаваннем.

 

Верасень –

у піянерскія лагеры краіны накіравана 3400 вучняў з Хойніцкага, Брагінскага і Нараўлянскага раёнаў.

 

1 кастрычніка –

закончана санітарная апрацоўка 246 населеных пунктаў, 31753 жылых дамоў.

 

23 кастрычніка –

закончана эвакуацыя 9246 сем’яў (22961 чалавек).

 

Лістапад –

над 4-м энергаблокам ЧАЭС узведзены аб’ект «Укрыццё» (Украіна).

 

Снежань –

на базе абласнога анкалагічнага дыспансера пачала работу радыеімуналагічная лабараторыя.