Задача дня – нарыхтоўка сена

Сельское хозяйство

У пачатку другой дэкады мая на тэрыторыі раёна склаліся аптымальныя пагодлівыя ўмовы для пачатку сезона нарыхтоўкі кармоў. Кароткачасовыя начныя дажджы стымулявалі рост травастою, а сонца, якое яшчэ не набрала максімальнай летняй актыўнасці, разам з цёплым майскім ветрам паспрыялі добраму правяльванню і прасыханню скошанай травяной масы. Такое надвор’е грэх было ўпусціць, і працаўнікі эксбазы «Стралічава» аднымі з першых у раёне, акурат у сярэдзіне апошняга веснавога месяца пачалі корманарыхтоўчую кампанію. Слова – в. а. галоўнага агранома гаспадаркі Ігару Яўгенавічу Кліменку.



– У гэтым годзе перад намі стаіць задача нарыхтаваць 850 тон сена, для чаго спатрэбіцца 4,5 тысячы тон зялёнай масы. У траншэі таксама плануем закласці 5550 тон сенажу і 11,5 тыс. тон сіласу. Але зараз, пакуль дазваляе надвор’е, асноўную ўвагу ўдзяляем кашэнню на сена і на зялёны корм.



Сена плануем нарыхтаваць не менш, чым было ў мінулую зімоўку, калі яго хапіла і грамадскаму статку, і жывёле насельніцтва: па 1 тоне на карову мы выдзялялі яго людзям, якія здавалі цялят у гаспадарку. Першачарговая ўвага нарыхтоўцы зялёнай масы на сена тлумачыцца яшчэ і тым, што летась, па прычыне засушлівага надвор’я, другі ўкос у большасці пайшоў на закладку ў траншэю, таму імкнемся зараз максімальна выкарыстаць магчымасці першага ўкосу траў для нарыхтоўкі сена.



Першым у нядзелю 15 мая на зялёную ніву выйшаў вопытны механізатар Сцяпан Іванавіч Шапялевіч. На трактары МТЗ 1523 з лідскай касілкай КЛД-3,14 ён і сёння косіць травы ў валкі, якія потым прасыхаюць і правяльваюцца, пасля чаго да работы на трактары МТЗ 80 з механічнымі граблямі прыступае трактарыст Фёдар Аляксеевіч Сідарэнка. Ён варушыць і пераварочвае валкі для раўнамернага і поўнага прасыхання.



На нарыхтоўцы травяной масы на зялёны корм за здзейнічаны кормаўборачны агрэгат КГ-6, на якім працуе адзін з самых аўтарытэтных механізатараў у гаспадарцы – Аляксандр Мікалаевіч Дрончанка. Ён падбірае і здрабняе правяленую масу, а потым грузіць яе ў кузаў аўтамабіля МАЗ. На ім гатовую зялёную масу на фермы адвозіць вадзіцель Аляксандр Міхайлавіч Ходас.



Дарэчы, думаюць у гаспадарцы не толькі пра сённяшні, але і заўтрашні дзень. Так, І.Я. Кліменка расказаў аб тым, што ўчастак уздоўж аўтатрасы Хойнікі – Брагін, на якім зараз вядзецца кашэнне траў для нарыхтоўкі сена, пасля завяршэння першага ўкосу будзе пераараны і на ім плануецца пасеяць пайзу – хуткарастучую кармавую культуру, з якой да завяршэння корманарыхтоўкі можна будзе паспець зняць яшчэ два ўкосы якаснай зялёнай масы. А з восені на будучы год на гэтым участку будзе створана 35 гектараў выдатнай многакампанентнай пашы.



Нядрэнна да гэтага часу паднялася і люцэрна на полі за Высокім. І тут плануюць узяць не менш двух укосаў: пасля заканчэння першага глеба будзе падкормлена мінеральнымі ўгнаеннямі, што таксама павінна даць добры травастой другога, а магчыма, і трэцяга ўкосаў.



Рана, з першымі промнямі сонца – у 5 гадзін раніцы – пачынаюцца работы, якія працягваюцца ўвесь светлавы дзень. А для таго, каб не губляць час, у гаспадарцы паклапаціліся аб двухразовым гарачым харчавані механізатараў – абеды і вячэры дастаўляюцца прама на зялёныя палеткі. Стымуляваць тэмпы і якасць работ павінны ўмовы аплаты працы, прэміравання, даведзеныя пад роспіс да кожнага нормы выпрацоўкі і ўмовы працоўнага спаборніцтва на нарыхтоўцы кармоў.


 


Віктар НАЗАРАНКА. 


 



Добавить комментарий

Ваш e-mail не будет опубликован. Обязательные поля помечены *