Сёння, калі краіне востра патрэбна валюта, рэзка ўзрастае значэнне стабільнай і рытмічнай работы прадпрыемстваў, прадукцыя якіх накіроўваецца на экспарт. У нашым раёне адным з такіх пастаўшчыкоў валюты ў казну дзяржавы з’яўляецца Палескі ўчастак ААТ «Малочныя прадукты». Яго малочную прадукцыю ахвотна закупляюць гандлёвыя арганізацыі Расіі і краін СНД. Казеін – рэчыва, якое шырока выкарыстоўваецца у харчовай прамысловасці, парфумерыі і іншых тэхнічных мэтах, прадпрыемства пастаўляе ў краіны Прыбалтыкі, ЗША, Германію і Польшчу.
На бліжэйшы час намечана і рэканструкцыя вытворчасці цвёрдых сыроў. Ужо ў жніўні на прадпрыемства павінна паступіць першая партыя абсталявання ў новы сыраробны цэх. А ў верасні пачнецца дэмантаж ранейшай тэхналагічнай лініі і мантаж новай, што дазволіць значна павялічыць выпуск цвёрдых сыроў. На прадпрыемстве разлічваюць, што запуск новага абсталявання ў вытворчы працэс павінен адбыцца ў апошнім месяцы года. Чым не прыемная навіна для многіх аматараў папулярных сартоў хойніцкіх сыроў, такіх як «Эмілорд», «Манастырэцкі», «Сметанковы» і іншыя?
Акрамя таго, мадэрнізацыя вытворчасці дазволіць прадпрыемству перапрацоўваць намнога болей тон малака, чым гэта было да яе пачатку.
Віктар НАЗАРАНКА.