Наведвальнікі аддзялення дзённага знаходжання інвалідаў, як вядома, людзі з абмежаванымі магчымасцямі. Аднак гэта не перашкаджае ім весці актыўны лад жыцця, кожны дзень яны ўзнімаюцца хоць на адну прыступку вышэй у сваіх ведах і ўменнях. Гэтаму, у прыватнасці, садзейнічае ўдзел у шэрагу культурна-масавых мерапрыемстваў. І як яскравы прыклад – рэгіянальны маладзёжны злёт «Палеская вясёлка-2011», які праводзіўся на працягу двух дзён ва ўрочышчы «Сідзельнікі» на Мазыршчыне.
Ад нашага ТЦСАН на злёт выязджалі Антон Шалоха, Аляксандр Лягун, Таццяна Чарняўская, Наталля Кладкевіч, якіх суправаджала кіраўнік гуртка дэкаратыўна-прыкладнога мастацтва і фларыстыкі С.А. Ляшчынская. Своеасаблівую групу падтрымкі стварылі галоўны бухгалтар ТЦСАН М.У. Навакоўская і вадзіцель А.А. Шчэрбак. Але трэба сказаць, што да гэтага мерапрыемства рыхтаваўся ўвесь калектыў сацыяльнай установы, якой былі прадстаўлены палаткі для пражывання і экіпіроўка каманды.
Кожны член каманды, згодна з умовамі конкурсу, з’яўляўся ўдзельнікам аднаго з чатырох з прапанаваных спаборніцтваў.
Запрашала ў сялянскую хатку, у якой былі сабраны прадметы старадаўняга беларускага побыту (ступа, дзяжа, маслабойка і інш.), дэкаратыўна-прыкладнога мастацтва (тканыя і вышываныя ручнікі і посцілкі) Наталля Кладкевіч. Таццяна Чарняўская горда крочыла па імправізаванаму подыуму ў арыгінальнай сукенцы, вырабленай з чорных поліэтылыневых пакетаў і прымацаванымі на адзенні ружамі з крэпавай паперы. Прадстаўляў убор нашай удзельніцы Антон Шалоха. Частаваў калег і гасцей мерапрыемства гаючым напіткам з рэвеню Аляксандр Лягун. З прывезеных інгрыдыентаў на суд журы была вынесена смачная і арыгінальна аформленая страва – лешч запечаны з гароднінай.
Па ўсіх намінацыях наша чацвёрка ўдзельнікаў увайшла ў лік шасці каманд-пераможцаў. А за гэта на ўрачыстай цырымоніі ўзнагароджвання пераможцаў з рук дырэктара Мазырскага тэрытарыяльнага цэнтра сацыяльнага абслугоўвання насельніцтва Л.В. Лобан хойніцкія канкурсанты атрымалі дыпломы, якія папоўнілі творчую скарбонку аддзялення дзённага знаходжання інвалідаў, і памятныя падарункі.
Ж. ШЛЁГ, спецыяліст па сацыяльнай рабоце аддзялення дзённага знаходжання інвалідаў ТЦСАН.
