Залежыць ад арганізацыі

У сельгаспрадпрыемствах раёна ў самым разгары ўборачная кампанія. Аб тым, як складваецца сітуацыя на хлебнай ніве расказвае карэспандэнту “ХН” начальнік упраўлення сельскай гаспадаркі і харчавання Хойніцкага райвыканкама Аляксандр Рыгоравіч ВАРАБЕЙ.

— Па стану на 26 ліпеня ўбрана 4429 гектараў з 11665, што складае 38 працэнтаў ад запланаванага. Зараз пастаўлена задача штодня ўбіраць не менш пяці працэнтаў плошчаў і ў цэлым гаспадаркі раёна прытрымліваюцца гэтай лічбы. Асабліва гэта датычыць сельгаспрадпрыемстваў “Веляцін”, дзе ўжо ўбрана 61% збожжавых, імя Мележа і “Стралічава” – па 47 працэнтаў плошчаў збожжавых культур. У раёне намалочана 12430 тон збожжа, сярэдняя ўраджайнасць складае 28,1 цэнтнера з гектара. Па валаваму намалоту наперадзе таксама ідуць “Стралічава” (2526 т), імя Мележа (2392 т) і “Веляцін” (2224 т). Калі гаварыць аб сярэдняй ураджайнасці, то самая высокая яна ў сельгаспрадпыремствах імя Мележа (31,6 ц/га), “Судкова” і “Хойніцкім Аграсервісе” (па 30,4 ц/га).

Зараз мы завяршаем уборку азімай пшаніцы (убрана 82 % плошчаў), якая ў цэлым па раёну дала самую высокую аддачу – у сярэднім па 32,8 цэнтнера з гектара, а ў “Хойніцкім Аграсервісе” – нават па 51,6 ц/га. Па 31 цэнтнеру з гектара азімага ячменю атрымалі хлебаробы сельгаспрадпрыемстваў “Судкова” і “Веляцін”.
Практычна завершана і ўборка азімага рапсу, ураджай якога склаў 1927 тон, сярэдняя ўраджайнасць – 15,7 цэнтнера з гектара. Самы высокі сёлета гэты паказчык атрыманы ў сельгаспрадпрыемстве “Аравічы” – 19,2 цэнтнера з гектара.

У цэлым нельга не адзначыць, што сюрпрызы надвор’я – засуха пачатку лета і дажджы ў чэрвені-ліпені, больш негатыўна адбіліся на яравых культурах, а вось азімыя пацярпелі ў намнога меншай ступені. Пагэтаму і зерне іх нават больш аб’ёмнае, чым у мінулым годзе.

Сёння ва ўсіх гаспадарках раёна дастаткова сучаснай уборачнай тэхнікі для таго, каб укласціся ў вызначаныя тэрміны жніва і ў цэлым мы ідзем па графіку ўборачнай. Аднак лепшыя вынікі атрымліваюць там, дзе працэс жніва дакладна і прадумана арганізаваны – у сельгаспрадпрыемствах “Веляцін”, імя Мележа і “Стралічава”. Гэта пацвярджаюць і лічбы, прыведзеныя мной вышэй.