Сталі пераможцамі
Заключным акордам цыкла мерапрыемстваў у рамках праходзячага летась Года кнігі з’явіўся абласны агляд-конкурс чытальнікаў і іншых выканаўцаў, прысвечаны 130-годдзю з дня нараджэння беларускіх пісьменнікаў Янкі Купалы і Якуба Коласа. Сцэна Добрушскага раённага Дома культуры сабрала 20 фіналістаў аналагічных раённых конкурсаў.
Дастойна прадставілі Хойнікшчыну нашы ўдзельнікі фіналу: прывезлі тры ўзна-гароды.
Не было роўных чытальніцы Марыне Краўчанка, натхнёна і пранікнёна прачытала яна ўрывак з драмы Я.Купалы «Раскіданае гняздо» і заслужыла Дыплом першай ступені.
Таксама Дыплом першай ступені атрымаў мужчынскі вакальны ансамбль, пакарыла сэрцы гледачоў і журы песня «Спадчына» на словы Я. Купалы, якую выканалі ўдзельнікі мужчынскага ансамбля Васілій Найдзенка, Міхаіл Краўчанка, Дзяніс Шарапаў і Леанід Шут. Апошні да таго ж атрымаў Дыплом трэцяй ступені за песню «Мой родны кут, як ты мне мілы…» на словы Якуба Коласа.
Усе дыпламанты з’яўляюцца ўдзельнікамі мастацкай самадзейнасці цэнтра культуры г. Хойнікі.
Клаўдзія Босак.
