На пасяджэнні прэзідыума раённага Савета дэпутатаў на чале з яго старшынёй Г.В. Бондар разгледжаны ход выканання мерапрыемстваў па стварэнню, утрыманню і развіццю сістэм пітнога водазабеспячэння, паляпшэнню якасці пітной вады ў Хойніцкім раёне на 2011-2015 гады.
Не ліквідаваны крыніцы нецэнтралізаванага водазабеспячэння, па просту кажучы, ніводнага непрыгоднага калодзежа за мінулую зіму не затампаніравана. У той час як, па словах галоўнага дзяржаўнага санітарнага ўрача раёна, дэпутата раённага Савета дэпутатаў Н.Р. Лагвінец, у нашым раёне 40% калодзежаў не адпавядаюць санітарным нормам па нітратах.
Не трэба затрачваць сілы і сродкі для правядзення лабараторнага аналізу вады, калі не праводзяцца планавыя работы па прамыўцы, рамонту багатай сістэмы водазабеспячэння ў раёне, дарэчы адной з самых вялікіх па агульнай працягласці ў параўнанні з іншымі раёнамі вобласці. Вядома, што любое змяненне напору ціску ў трубах выклікае бурны ўздым іржаўчыны. І як такую ваду піць? Ёсць і такія недапрацоўкі, калі пабудаваныя сеткі водазабеспячэння не завершаны лагічна сістэмай водаадвядзення. Адсюль і праблемы, напрыклад, у Велікаборскім сельсавеце з утылізацыяй каналізацыйных сцёкаў. А гэтым у сваю чаргу парушаецца і экалагічнае заканадаўства.
Вяртаючыся да тэмы тампаніравання калодзежаў, Г.В. Бондар падкрэсліла, што неадкладна гэту работу трэба выканаць там, дзе маюцца правалы. Толькі разумны падыход да тампаніравання павінен быць. Галоўнае – не пазбавіць людзей адзінай крыніцы водазабеспячэння, альтэрнатыва – устройства дробнатрубчатых калодзежаў. Прычым якаснае ўстройства, а не так, як на тэрыторыі Паселіцкага сельсавета, дзе з-за павышанай мутнасці карыстацца вадой для піцця немагчыма.
Галіна Віктараўна не пакінула без увагі ход асваення грашовых сродкаў па ўсіх крыніцах фінансавання, у тым ліку па праграме «Чыстая вада», згодна з якімі праводзіцца мадэрнізацыя і рэканструкцыя каналізацыйна-помпавых станцый у раёне, станцыі другога пад’ёму вады ў Хойніках і інш.
У ходзе пасяджэння ўздымалася і праблема самавольных урэзак у сістэму водаправода, што ні ў якім разе недапушчальна рабіць грамадзянам у першую чаргу па санітарных нормах і правілах. Менавіта таму рашэнне прэзідыума вырашана дапоўніць адпаведным пунктам – выкарыстаная насельніцтвам вада павінна быць якаснай, уся ўлічана і аплачана. А каб кантроль за гэтым быў дзейсным, неабходна аддзелу ЖКГ і па праблемах ліквідацыі вынікаў аварыі на ЧАЭС распрацаваць адпаведны алгарытм па забеспячэнню адзінага кіравання і рэгулявання пытанняў пітнога водазабеспячэння ў раёне, а таксама рэальныя рычагі неадкладнага ўздзеяння на законных уласнікаў водаправодных сістэм за выяўляемыя парушэнні.
Тэкст і фота Ірыны ЛУКАШЭНКА.