У прайшоўшую сераду інфармацыйна-прапагандысцкая група раённага Савета дэпутатаў на чале са старшынёй райсавета Г.В. Бондар выязджала ў вёску Клівы для вядзення адкрытай размовы з мясцовым насельніцтвам па ўсіх напрамках жыццядзейнасці. Удзел у сустрэчы прынялі дэпутат Палаты прадстаўнікоў Нацыянальнага сходу Рэспублікі Беларусь С.У. Чэкан і галоўны спецыяліст Гомельскага абласнога ўпраўлення Міністэрства па надзвычайных сітуацыях Рэспублікі Беларусь А.В. Дамінцян.
Працягваючы тэму, Г.В. Бондар заклікала людзей да ўдумлівага абыходжання з адходамі, бо ў адваротным выпадку пагаршаецца экалогія. Зямлю нельга забруджваць, яна – наша карміцелька, павінна аддачу прыносіць, а гэта магчыма толькі пры граматных, паважлівых адносінах да яе. Гаварыла Галіна Віктараўна і пра тое, што паступова ліквідуюцца ў раёне міні-палігоны, не за гарамі той час, калі засыплюць і той, што за Клівамі. А гэта значыць, што ўсім жыхарам трэба заключыць дагаворы з КЖУП «Хойніцкі камунальнік» на вываз смецця.
Да прысутных яна давяла інфармацыю пра сацыяльна-эканамічнае развіццё раёна, навядзенне парадку на зямлі, у тым ліку аб добраўпарадкаванні могілак і інш.
Выступаючыя прадстаўнікі служб раёна гаварылі на розныя тэмы па сваіх галінах: папярэджвалі аб недапушчэнні п’янства, падмацаваўшы гэтую прафілактычную работу відэаролікам аб жыцці-быцці п’яніц з ліку жыхароў раёна, якія страчваюць чалавечую годнасць і аблічча, здзяйсняюць аварыі на дарозе. Каб не дапусціць падобнага, у раёне ўведзена абмежаванне продажу спіртнога з 18.00 да 10.00. Потым – пра шкоду пры ўжыванні наркотыкаў, аб захаванні ўласнай маёмасці, каб не выкралі яе, пра прыватызацыю жылля, дэмантаж вулічных калонак, дэмаграфічную абстаноўку і інш.
Супрацоўнікі МНС В.В. Сацура і А.В. Дамінцян завастрылі ўвагу на асноўных правілах недапушчэння пажараў – не курыць у пасцелі, не пакідаць без нагляду агонь у печы, грубцы, устанавіць пажарны апавяшчальнік, а таксама прадэманстравалі відэафільм аб тым, як агонь, горш чым злодзей, пазбаўляе людзей усяго, калі разгуляецца ў доме. Дарэчы, А.В. Дамінцян адзначыў станоўчую работу ў раёне аглядных камісій, галоўнае – пры дамавым абходзе ён убачыў замененую электраправодку, адрамантаваныя печы, як таго і патрабавалі прадпісанні членаў аглядных камісій. А яшчэ пахваліў і назваў вартым пераймання вопыт работы РАНС па прыцягненню сродкаў індывідуальных прадпрымальнікаў для набыцця і ўстаноўкі ў дамах мнагадзетных сем’яў аўтаномных пажарных апавяшчальнікаў.
Дэпутат Палаты прадстаўнікоў Нацыянальнага сходу Рэспублікі Беларусь С.У. Чэкан расказала пра законатворчую дзейнасць у нашай краіне, пра захаванне прыярытэтаў сацыяльнай накіраванасці пры фарміраванні бюджэту дзяржавы наступнага года і інш.
Кліўчане ў сваю чаргу прасілі дапамогі мясцовай гаспадаркі ў апрацоўцы зямельных надзелаў, арганізацыі дыскатэк у мясцовым сельскім клубе, прасілі растлумачыць, на аказанне якіх бясплатных паслуг сацыяльнай службы могуць разлічваць пажылыя людзі.
Больш за 2-гадзінная гаворка завяршылася культурным адпачынкам, для вяскоўцаў спявалі ўдзельніцы жаночага ансамбля «Журавінка» аўтаклуба.
Тэкст і фота Ірыны ЛУКАШЭНКА.
