Будзем з малаком!

Назву гэтай публікацыі варта ўспрымаць як заклік. Сельгасвытворцам трэба прыкладаць усе намаганні, плённа працаваць, тым больш, што для гэтага ў нашым раёне ствараюцца найлепшыя ўмовы.

У канцы мінулага года ўведзены ў эксплуатацыю 6 новых даільна-малочных блокаў, а днямі спіс жывёлагадоўчых новабудоўляў папоўніўся яшчэ і вялізным комплексам у вёсцы Пудакоў.
Гэта падзея адбылася 6 лістапада, дарэчы, у гэты ж дзень расчыніў дзверы пасля рэканструкцыі Палац культуры металургаў у Жлобіне. Адкрыццё гэтых двух сацыяльна значных аб’ектаў у Гомельскай вобласці прымеркавалі да гадавіны Кастрычніцкай рэвалюцыі.

Гасцей свята ў Пудакове, а для нашага раёна гэта падзея стала сапраўдным святам, песнямі-танцамі вітаў народны ансамбль «Крыніца» дзіцячай школы мастацтваў. Пасля пад гучныя апладысменты прысутных работнікаў і будаўнікоў чырвоную стужку перарэзалі намеснік старшыні Гомельскага аблвыканкама У.А. Прывалаў, старшыня Хойніцкага райвыканкама А.І. Ціток і дырэктар КСУП «Веляцін» А.В. Яськоў.
Узвядзенне комплексу пачалося ў 2012 годзе. Амаль тры гады будаўніцтва, амаль 80 мільярдаў рублёў з абласнога і рэспубліканскага бюджэту – і вось аб’ект практычна цалкам уведзены ў эксплуатацыю. Нагадаем, што гэта адзін з этапаў рэалізацыі Дзяржаўнай праграмы па пераадольванню наступстваў катастрофы на Чарнобыльскай АЭС. На будаўніцтве фермы было задзейнічана мазырскае ААТ «Палессебуд», у склад якога ўваходзіць і хойніцкая ПМК.
Малочна-таварны комплекс уключае тры кароўнікі, у тым ліку адзін з радзільным аддзяленнем, два цялятнікі, даільна-малочны блок з залай тыпу «елачка» на 32 месцы, склад і траншэі для захоўвання кармоў і сенажу. Прадстаўнікі абласной і раённай улады пабывалі ў новых жывёлагадоўчых памяшканнях, паглядзелі, як кароўкі абжываюцца ва ўтульных «апартаментах», а работнікі асвойваюць новыя тэхналогіі і абсталяванне. Дарэчы, увесь гэты маштабны комплекс будуць абслугоўваць усяго 15 чалавек.

Ферма разлічана на 1000 галоў буйной рагатай жывёлы, у тым ліку 600 галоў дойнага статку. Па прагнозах, яго прадукцыйнасць складзе не менш чым 5000 кілаграмаў малака на карову ў год. Хаця стаўка робіцца не толькі на аб’ёмы, але і на якасць: тут разлічваюць атрымліваць малако пераважна гатункам «экстра».

Намеснік старшыні Гомельскага аблвыканкама Уладзімір Аляксандравіч Прывалаў выказаў словы ўдзячнасці ўсім, хто ўнёс уклад у стварэнне новага вытворчага аб’екта. Ён адзначыў, што сельская гаспадарка – эканамічная «падушка бяспекі» краіны, заклікаў хайнічан аддана працаваць на карысць роднай Гомельшчыны, раёна і пажадаў высокіх вытворчых дасягненняў.

Кіраўнік нашага раёна А.І. Ціток засяродзіў увагу на тым, што новы комплекс – гэта дадатковыя працоўныя месцы. Калектыў тут невялікі, што дасць магчымасць работнікам мець высокую заработную плату, але такімі ж павінны быць іх адказнасць і аддача ў працы.

Наталля ЧЭКАН.

Фота аўтара і Алены СМУСЯНОК.