Выступленні агітбрыгады работнікаў аддзела культуры райвыканкома на працягу ўсёй уборачнай кампаніі ўздымалі настрой працаўнікам нівы, настройвалі іх на плённую, самаадданую працу. Вясёлымі песнямі самадзейныя артысты выказвалі любоў да Радзімы, гордасць і павагу да нялёгкай, але такой патрэбнай людзям, прафесіі хлебароба. Яскравыя, артыстычныя выступленні-падарункі ад таленавітых выканаўцаў Ліліі Уладзіміраўны Краўчанка, Мікалая Іванавіча Кабанькова, Васілія Пятровіча Найдзенкі, Анжэлы Анатольеўны Бондар і баяніста Рыгора Мікалаевіча Лушча атрымалі працаўнікі ўсіх сельскагаспадарчых прадпрыемстваў раёна.
На палях, каля разгарачаных ад летняга сонца і напружанай работы камбайнаў, ліліся песні, якія стваралі асаблівую, цёплую атмасферу. З вялікім натхненнем агітбрыгада выступала перад камбайнерамі і вадзіцелямі ў час абедзеннага перапынку. Невялікі прамежак часу, адведзены на адпачынак, ператвараўся ў мінуты добрага настрою, якія выклікалі ў герояў жніва шчаслівую ўсмешку.
Радасці і ўдзячнасці работнікаў гаспадарак не было межаў – песні ў выкананні самадзейных артыстаў нязменна кранаюць самыя тонкія струны душы. Таму ўсюды іх выступленні суправаджалі дружныя апладысменты.
З прафесійнымі перамогамі віншавалі артысты абрадавымі песнямі і танцамі хлебаробаў і на ўрачыстым святкаванні раённых “Зажынак” і “Дажынак”. У музычных кампазіцыях, выкананых на высокім узроўні, работнікі культуры ўслаўлялі тых, хто сваёй працай стварае харчовую бяспеку краіны.
Тэкст і фота Наталлі ЧЭКАН.