Дзень абаронцаў Айчыны – гэта свята многіх пакаленняў, тых, хто абараняў маладую Савецкую Рэспубліку, Радзіму ад нямецка-фашысцкіх захопнікаў, і тых, хто пасля стаяў і стаіць на абароне мірнага жыцця.
Гэта свята сапраўдных мужчын. Напэўна, няма сям’і, працоўнага калектыву, якія б не адзначалі гэты дзень, не віншавалі пасівелых ветэранаў і тых, хто ўжо ў мірны час праходзіў або праходзіць службу ва Узброеных Сілах Рэспублікі Беларусь.
На Хойнікшчыне мерапрыемствы, прымеркаваныя да гэтай даты, пачаліся задоўга да 23 лютага з сустрэч прадстаўнікоў маладога пакалення з ветэранамі Вялікай Айчыннай вайны, воінамі-афганцамі, у школах прайшлі спартакіяды, конкурсы, віктарыны, не засталіся ў баку работнікі Дамоў культуры і клубаў.
Галоўнае ж ушанаванне мужчын прайшло ў панядзелак 23 лютага ў дзіцячай школе мастацтваў. Ветэраны, служыўшыя некалі ў арміі, маладыя юнакі, якім яшчэ прадстаіць стаяць на варце Айчыны. Армія патрэбна заўсёды, яна – наша ўпэўненасць у абароназдольнасці і спакоі мірнай працы.
З кароткай прамовай да прысутных звярнулася старшыня раённага Савета дэпутатаў Г.М. Рабінкіна, адзначыўшы, што Дзень абаронцаў Айчыны і Узброеных Сіл Рэспублікі Беларусь – асаблівае свята для нашай краіны, свята мужнасці, адданасці Радзіме і пераемнасці пакаленняў. На долю беларускага народа выпала нямала выпрабаванняў. Таму наш абавязак заўсёды памятаць аб тых воінах, якія ў гады Вялікай Айчыннай вайны стаялі насмерць за мір, спакой і незалежнасць нашай краіны.
Галіна Мікалаеўна шчыра і сардэчна павіншавала прысутных у зале са святам, пажадала здароўя, шчасця, мірнага неба над галавой.
А затым адбыўся святочны канцэрт, удзел у якім прымалі самадзейныя артысты раённага Дома культуры, ГЦКіС, дзіцячай школы мастацтваў і самыя маленькія артысты – выхаванцы дзіцячага сада № 4 “Васілёк”.
Уладзімір СЯМЁНАЎ.