Да праблемы лазні № 2 нашага горада рэдакцыя “ЛС” звярталася неаднойчы. Аднак пытанняў, тэлефонных званкоў наконт таго, калі яна пачне працаваць, не зменшылася. Таму палічылі неабходным сустрэцца з дырэктарам КЖУП “Хойніцкі камунальнік” А.М. Клюкаўкіным, каб прасвятліць становішча спраў.
– Андрэй Мікалаевіч, на якім зараз этапе праводзяцца работы на гэтым важным аб’екце?
– Засталося выканаць сантэхнічныя мерапрыемствы, завяршыць аддзелачныя работы, наладзіць сістэму вентыляцыі. У гэтым пераліку найбольшых намаганняў патрабуе сантэхніка.
– Якім чынам будзе выглядаць абноўленая лазня?
– У ёй прадугледжаны два аддзяленні – мужчынскае і жаночае, душавыя кабінкі, ванна. У бліжэйшай перспектыве і адкрыццё сауны для аматараў сухой пары.
Для наведвальнікаў будуць прапаноўвацца венікі, бялізна. Абсталюем буфет з прахаладжальнымі напіткамі. Там жа можна будзе набыць тавары, спадарожнічаючыя знаходжанню ў лазні.
– Што можаце сказаць аб добраўпарадкаванні прылягаючай да лазні тэрыторыі?
– Яго выканае на дагаворнай аснове калектыў дарожна-будаўнічага ўпраўлення № 23.
– Андрэй Мікалаевіч, калі можна будзе пажадаць хайнічанам і гасцям нашага горада гарачай пары ў абноўленай лазні?
– Гэта адбудзецца ў маі месяцы (гэта не першакрасавіцкі жарт. – ад рэд.).
Гутарыла Клаўдзія МІКАЛАЕВА.
