Школа для кожнага чалавека застаецца светлым, радасным астраўком дзяцінства. На жаль, дарослым на яго ўжо ніколі не вярнуцца… Толькі настаўнікі на ім маюць пастаянную прапіску. Школа для педагогаў – родны дом, а вучні – іх дзеці, памочнікі, сябры, якіх яны акружаюць сваім душэўным клопатам. Напярэдадні Дня настаўніка педагогі раёна сабраліся ў гарадской сярэдняй школе № 3, каб разам адзначыць сваё прафесійнае свята.
Першымі ўшаноўвалі ветэранаў педагагічнай працы – людзей, якія многія гады, не шкадуючы сіл і здароўя, абагачалі дзяцей ведамі, падобна пралітаму дажджу для прарастаючага насення. У іх адрас прагучала многа цёплых слоў і пажаданняў, былі ўручаны кветкі. Не засталіся без увагі і тыя, хто адзначыў свой дзень нараджэння напярэдадні Дня настаўніка – настаўніца беларускай мовы і літаратуры сярэдняй школы № 3 В.А. Васькевіч і загадчыца ясляў-сада № 4 А.І. Рабянок. Уручаючы падарункі, імянінніцам жадалі моцнага здароўя, творчага натхнення і дабрабыту.
У асяроддзі педагогаў і выхавальнікаў Хойнікшчыны вялікая колькасць 
энтузіястаў. Сярод іх адзначаныя на мерапрыемстве загадчыца дзіцячага ясляў-сада № 5 Л.І. Міхед, яе намеснік Л.У. Дзенісюк, кіраўнік танцавальнага гуртка ЦТДіЮ А.В. Ляснічая і трэнер СДЮШАР А.М. Лук’яненка. Іх арыгінальныя падыходы, метады работы і дасягненні ўвайшлі ў скарбонку педагагічнага майстэрства раёна.
Пранікнёнымі словамі віншавалі педагогаў іх выхаванцы і калегі. Праграма канцэрта была насычана песнямі, танцамі, інсцэніроўкамі, паказальнымі выступленнямі. Музычныя падарункі педагогі атрымалі і ад удзельнікаў ансамбля “Крыніца” дзіцячай школы мастацтваў. Прыемна ўразіла прысутных віртуальнае віншаванне вучняў Глінішчанскага дзіцячага сада-СШ.
Сардэчна павіншаваў настаўнікаў намеснік старшыні райвыканкома В.М. Шаўчэнка. Пажадаў шчасця, поспехаў у педагагічнай дзейнасці, творчых ідэй і іх ажыццяўлення і ўручыў Ганаровыя граматы райвыканкома метадысту па ахове правоў дзяцінства аддзела адукацыі Г.В. Моўчан (на здымку), сацыяльнаму педагогу сярэдняй школы № 2 Н.І. Канцэвіковай, намесніку дырэктара па вучэбнай рабоце Судкоўскай СШ Н.А. Ходас. 
Словы ўдзячнасці ветэранам і педагогам выказала начальнік аддзела адукацыі Л.Ф. Кулакоўская. Далучылася да віншаванняў старшыня райкома прафсаюзаў работнікаў адукацыі Т.М. Сямёнава. Яны ўручылі кветкі і Ганаровыя граматы абласнога ўпраўлення і аддзела адукацыі райвыканкома, а таксама абласнога камітэта Беларускага прафсаюза работнікаў адукацыі і навукі 15 лепшым з лепшых. Прыемнай нечаканасцю стала тое, што былі ўзнагароджаны бібліятэкар Паселіцкага дзіцячага сада-СШ Л.В. Дорах і старшая медсястра ясляў-сада № 1 г. Хойнікі М.Р. Тарасавец.
Дзень настаўніка – гэта свята асаблівае, таму што адзначае яго кожны чалавек, бо, перш за ўсё, ён чыйсьці былы вучань. Таму павіншаваць педагогаў прыйшлі людзі розных прафесій і ўзростаў. Са шчырымі пажаданнямі перад прысутнымі выступілі начальнік аддзела культуры райвыканкома В.І. Баранаў і першы сакратар РК ГА “БРСМ” Л.А. Гаркуша.
Спрыялі добраму настрою прысутных выстаўкі падзелак, фотаздымкаў, кулінарных шэдэўраў.
Наталля ЧЭКАН.
Фота Ірыны Новікавай.