Купанне і катанне на лодках з’яўляюцца добрым адпачынкам, умацоўваюць арганізм, развіваюць спрыт і вынослівасць. Аднак каб не здарылася няшчасця, нават умеючыя плаваць і карыстацца лодкай павінны захоўваць правілы паводзін на вадзе, быць дысцыплінаванымі.
Пачынаць купанне можна толькі па дазволу ўрача, у сонечнае і бязветранае надвор’е, пры тэмпературы паветра не ніжэй плюс 20 градусаў і не раней чым праз гадзіну пасля ежы. Купацца патрэбна толькі ва ўстаноўленых або добра знаёмых месцах.
Пры купанні катэгарычна забараняецца:
– заплываць далёка ад берага, выплываць за агароджванні месц купання;
– забірацца на тэхнічныя папераджальныя знакі, буі, бакены і інш.;
– знаходзіцца на вадзе ў нецвярозым стане.
Кожная прагулачная лодка (вёславая або маторная) павінна быць спраўнай і мець неабходны камплект выратавальных сродкаў. Каб не парушыць раўнавагу лодкі, пры пасадцы трэба ўваходзіць у яе па аднаму, ступаючы на сярэдзіну насціла і раўнамерна рассаджвацца на сядзенні. Перагружаць лодку звыш устаноўленых норм катэгарычна забараняецца.
У час руху не дазваляецца ўставаць, мяняцца месцамі, садзіцца на борт, а таксама пераходзіць з адной лодкі ў другую.
Катанне на вёславых прагулачных лодках павінна праводзіцца недалёка ад берага. Абганяць другую лодку рэкамедуецца з левага боку ў напрамку руху. У ветранае надвор’е катанне на лодках забараняецца.
Асноўнай прычынай гібелі на вадзе малалетніх дзяцей з’яўляецца адсутнасць нагляду за імі дарослых, а школьнікаў – няўменне плаваць. Часам толькі першы крок аддзяляе мелкае месца ад глыбокага. Зрабіўшы гэты крок, дзіця страчвае раўнавагу і, калі ўзровень вады акажацца вышэй галавы, пачынае захлёбвацца і тануць. Таму няўмеючым плаваць асабліва небяспечна ўваходзіць у ваду ў незнаёмых месцах, дзе могуць аказацца ямы, вадавароты, водарасці.
Трапіўшы ў моцнае цячэнне, не плывіце супраць яго – можна выбіцца з сіл. У гэтым выпадку трэба плыць па цячэнню, паступова набліжаючыся да берага.
Аказаўшыся ў водавароце, не губляйцеся: набярыце пабольш паветра ў лёгкія, пагрузіцеся ў ваду і, зрабіўшы моцны рывок у бок па цячэнню, усплывіце на паверхню.
Калі заблыталіся ў водарасцях, не рабіце рэзкіх рухаў. Зрабіўшы глыбокі ўдых, пагрузіцеся з галавой у ваду і спакойна вызваліце ад раслін спачатку рукі, затым ногі, і, перавярнуўшыся на спіну, асцярожна выплывайце з небяспечнай зоны.
Нельга карыстацца самаробнымі плытамі, дошкамі, аўтамабільнымі камерамі, надуўнымі матрацамі.
Большасць цяжкіх траўм пры купанні адбываецца ў час скачкоў у ваду з крутых берагоў, мастоў, лодак і ў неправераных месцах у выніку удараў пад вадой аб камні, сваі або само дно.
У выніку ператамлення або пераахалоджвання ў вадзе ў плыўца магчымы сутарагі мышц, сардэчныя спазмы, парушэнне дыхання і страта свядомасці.
Пры стамленні трэба легчы на спіну і спакойна, без рэзкіх рухаў плыць па напрамку да берага, працуючы толькі нагамі, а рукі, высунуўшы з вады, сціскаць у кулакі і расціскаць, пакуль сутарагі не спыняцца.
І памятайце: захаванне правіл паводзін на вадзе – гарантыя вашага жыцця.
М. РАМАНЕНКА,
старшыня раённага
таварыства выратавання на вадзе.