Патрабуе вырашэння


Па Краснаніўскай аўталаўкі не будзе

У рэдакцыю газеты звярнуліся жыхары вул. Краснаніўская райцэнтра з пытаннем, чаму па іх вуліцы не ездзіць болей аўтамагазін райспажыўтаварыства. Ім, грамадзянам сталага ўзросту, цяжка дабірацца нават да недалёка размешчанага «Еўраопта».

Як патлумачылі ў райспажыўтаварыстве, у сувязі з нерэнтабельнасцю ўсёй работы аўтамагазінаў у раёне, іх колькасць зменшана, а маршруты размеркаваны такім чынам, каб ахапіць населеныя пункты, дзе няма стацыянарных магазінаў і дзе яшчэ не ездзяць аўтамагазіны сеткі «Еўраопт». Аднаўляць работу аўталаўкі па вул. Краснаніўская не плануюць.

У аддзеле эканомікі райвыканкама адзначылі, што «Еўраопт» пакуль што не плануе адкрываць новыя маршруты, у прыватнасці ў межах горада.

«Адпачывайце» на зламаных лаўках

Такія вось «дзіравыя» лаўкі чакаюць пакупнікоў каля магазі-на райспажыўтаварыства, які змешчаны на перакрыжаванні вуліц Мележа і Берагавога райцэнтра. Лепш іх увогуле ўбраць, чым такой «прыгажосцю» красавацца.

Вуліца Мележа чакае тратуара

Так спраўна ўзяліся камунальная і дарожная службы за ўладкаванне тратуара па вул. Сялянскай. Але ж дзеля бяспекі дзяцей не хапае тратуара і па вул Мележа, той яе частцы, што ідзе ад перакрыжавання з Сялянскай у бок Вялікага Бору. Вучні таксама ідуць практычна па праезнай частцы. Магчыма і да гэтага ўчастка справа дойдзе?

Падрыхтавалі Вольга БЕЛАШ і Вікторыя МАРОЗ.



Добавить комментарий

Ваш адрес email не будет опубликован. Обязательные поля помечены *