У першую чаргу адзначым, што адыходзячы ў гісторыю год быў багатым на юбілеі і важныя грамадска-палітычныя падзеі. Так, 18 лютага прайшлі выбары ў мясцовыя Саветы дэпутатаў Рэспублікі Беларусь.
Сваё 100-годдзе адзначылі Узброеныя Сілы Рэспублікі Беларусь, Усесаюзны Ленінскі Камуністычны Саюз Моладзі, сістэма ваенных камісарыятаў Рэспублікі Беларусь, служба крымінальнага вышуку і камісія па справах непаўналетніх райвыканкама.
80 год споўнілася з дня ўтварэння нашай Гомельскай вобласці; такі ж юбілей адзначыў і калектыў РУП «Хойніцкая фабрыка мастацкіх вырабаў».
75 год прайшло з Дня вызвалення Хойніцкага раёна ад нямецка-фашысцкіх захопнікаў.
60 год споўнілася КВУП «Хойніцкі рамонтны завод».
45 год з дня свайго заснавання адзначылі ў Хойніцкім філіяле КУП па забеспячэнню палівам «Гомельаблпаліва».
35 год споўнілася раённаму Дому-музею І.П. Мележа.
30-годдзе з дня свайго заснавання адзначыў Палескі дзяржаўны радыяцыйна-экалагічны запаведнік.
25 год споўнілася ўзорнаму калектыву эстраднага танца «Драйв» ЦТДіМ.
Акрамя таго, быў адкрыты Помнік ліквідатарам- энергетыкам у мікрараёне «Юбілейны» нашага горада і здадзены ў эксплуатацыю два 40-кватэрных дома.
Запомніўся год і персанальнай выстаўкай знакамітага мастака, нашага земляка У.Ц. Гардзеенкі.
Калі пераходзіць на асобы, то і тут нам ёсць чым ганарыцца. У лютым званне «Жанчына года» было прысвоена намесніку старшыні райвыканкама Ж.М. Чарняўскай.
Бронзавым прызёрам чэмпіянату свету па веславанню на байдарках і каноэ стала наша зямлячка Вольга Худзенка. Восьмы раз у сваёй трэнерскай кар’еры (і трэці раз запар!) лепшым футбольным трэнерам Рэспублікі Беларусь быў прызнаны Віктар Ганчарэнка.
Нельга не ўспомніць і аб тым, што адным з лаўрэатаў ХІV Нацыянальнага конкурсу друкаваных сродкаў масавай інфармацыі «Залатая літара» стала наша газета «Хойніцкія навіны».