Рэканструкцыя Хойніцкага наліўнога пункта РУП «Беларуснафта – Гомельаблнафтапрадукт» уступіла ў завяршаючую стадыю. Аб тым, што зроблена і што застаецца зрабіць, расказвае майстар гэтай арганізацыі Дзмітрый Леанідавіч Барысенка.
– На сённяшні дзень завершаны ўсе работы па замене трубаправодаў і ёмістасцей, мантажу тэхналагічнага абсталявання, а таксама будаўніча-мантажныя работы па ўзвядзенню новага адміністрацыйна-бытавога корпуса. Іх асноўны аб’ём выконвалі спецыялісты калінкавіцкага ТАА «Вега». Нямала зроблена па добраўпарадкаванню тэрыторыі: уся яна заасфальтавана, пракладзены дарожкі з тратуарнай пліткі і новае дарожнае палатно. Гэтым займаліся і займаюцца зараз нашы дарожнікі з ДРБУ-155.
Асноўная задача на сёння – пусканаладачныя работы і ўстаноўка праграмнага забеспячэння на новым тэхналагічным абсталяванні. Спецыялісты гомельскага ТАА «Энергаспеццэнтр» прыступяць да іх выканання ўжо ў красавіку.
Таксама адзначу, што ў ходзе рэканструкцыі прыкметна скарацілася тэрыторыя нашай арганізацыі, дэманціравана і масіўная бетонная агароджа ўздоўж дарогі па вул. Рэвалюцыйнай (на здымку ўнізе). Вызваленыя плошчы перададзены ДЛГУ «Хойніцкі лясгас», мы сумесна з работнікамі лясгаса вядзём добраўпарадкаванне, засеем іх газоннай травой. Запланавана таксама пракладка дарожкі да пажарнага вадаёма. Такім чынам, гэты ўчастак горада набудзе больш экалагічнае, «зялёнае» аблічча.
Запісаў Віктар НАЗАРАНКА.
