Па натуры старшыня раённага Савета дэпутатаў Галіна Бондар не кабінетны чалавек, таму яе часцей можна сустрэць у якой-небудзь вёсцы ці на прадпрыемстве.
Iдзе яна на фермы, у цэхі, цiкавiцца работай i клопатамі хайнічан. Прысядзе на лавачцы пагутарыць з бабулькамі, ці дзесьці па дарозе прыпыніцца, распытае ў моладзі пра справы. І заўсёды ў сваім блакноце запiсвае новыя задумкi, праблемы, пытанні, прапановы, адрасы і тэлефоны.
Таму большасць вяскоўцаў ведае асабіста, ведае, што іх хвалюе, а некаторых нават пазнае па голасе. На прамую лінію трапіў званок – яна толькі падняла трубку і стала відавочна, што адразу зразумела аб чым пойдзе гаворка. «Добры дзень. Канешне, даражэнькая, памятаю Вашу просьбу. Не хвалюйцеся, абяцаю, што РЭС дапаможа», – пачала гутарку Галіна Віктараўна. Паcля размовы яна патлумачыла, што тэлефанавала жыхарка Храпкава і хацела, каб спілавалі дрэва каля дома. Гэта пытанне знаходзіцца ў яе на кантролі, таму буде вырашана.
А вось наступнае паступіўшае пытанне значна складаней вырашыць. Калі ў вас выпадкова зачыніліся дзверы (да прыкладу, скразняком) выратавальнікі прыедуць не заўсёды. Справа ў тым, што па законе, супрацоўнікі МНС займаюцца аварыйным выкрыццём замкоў у выпадку, калі гэта можа прывесці да надзвычайнай сітуацыі: пажару або калі дзіця пакінута ў кватэры без нагляду. Аднак жыццёвыя сітуацыі бываюць розныя, і вось як паступіць: па інструкцыі, ці па-чалавечы?
Знайсці выйсце – унесці пэўныя прапановы аб унясенні змяненняў у нарматыўныя дакументы, якія рэгламентуюць пералік платных паслуг Міністэрства па надзвычайным сітуацыям, – дапаможа Член Савета Рэспублікі Ала Смаляк, якая прыняла ўдзел у ліпеньскім Дні дэпутата. Яна паабяцала дэтальна разабрацца ў гэтай праблеме.
Пасля сумеснага прыёму грамадзян і прамой лініі, сенатар з Галінай Віктараўнай пабывала ў Судкова, дзе яны сустрэліся з мясцовымі жыхарамі. Праязджаючы па аграгарадку, Ала Віктараўна выказала сваё захапленне тым, наколькі прыгожы і ўтульны гэты куточак. Сапраўды ёсць нагода ганарыцца малой радзімай і краінай у цэлым. Дагледжаныя вуліцы, арыгінальнае добраўпарадкаванне, развітая інфраструктура, чыстае блакітнае неба, усмешкі прахожых, смех дзяцей, залацістыя палі…
І прыемна, калі людзі любяць свой край, калі яны неабыякавыя, калі яны выступаюць за развіццё і рух наперад. Адзін з такіх хайнічан уступіў у дыялог з сенатарам. Размова была канструктыўнай з дакладнымі прыкладамі і пазітыўнымі меркаваннямі. Прагучалі прапановы аб пашырэнні прэферэнцый і льгот для прыватнага бізнесу ў невялікіх раёнах, а таксама аб ўнясенні карэктыў у мытнае заканадаўства.
Наогул абмяркоўвалася шмат тэм, але ўсе яны былі аб’яднаны адзінай думкай: Беларусь – прыклад стабільнасці і ўпэўненасці ў заўтрашнім дні. Наша краіна за апошнія дзесяцігоддзі дасягнула добрых паказчыкаў у многіх сферах: палітыка, эканоміка, медыцына, адукацыя, культура, спорт. Ала Смаляк расказвала аб дасягненнях у краіне і ў вобласці, а Галіна Бондар, прыводзячы канкрэтныя лічбы, абмалёўвала становішча спраў у нашым раёне. А закончылася сустрэча выказваннем, што наша беларуская прырода такая ж мілая, сціплая, родная, як і людзі, якія жывуць на зямлі пад белымі крыламі. І разам нам пасільна многае.
У той жа дзень Галіна Віктараўна правяла яшчэ адну сустрэчу – з жыхарамі вёскі Дворышча. Ніякіх праблем вяскоўцы не ўзнялі, пагутарылі душэўна аб надзённым, паслухалі інфармацыю, якую расказалі члены інфармацыйна-прапагандысцкай групы. Дзень дэпутата, як заўсёды, атрымаўся насычаным. А адна хайнічанка адзначыла:
– Галіна Віктараўна заўжды там, дзе патрэбна іншым. Яе працаздольнасць здзіўляе, здаецца, не адпачывае ні пасля работы, ні па выхадных. Падтрымлівае землякоў. І, ведаеце, гэта ўвага каштоўная.
Наталля РЭВЯКА.
Фота аўтара.
