Увага зваротам грамадзян максімальная
Магчымасць звярнуцца да старшыні раённага Савета дэпутатаў Галіны Бондар у дзень дэпутата, які праходзіць кожную трэцюю сераду месяца, маюць усе грамадзяне.
Адны звяртаюцца з пытаннямі і праблемамі, другія – з прапановамі, у тым ліку і аб паляпшэнні работы той ці іншай структуры, ёсць і скаргі на дрэнную работу адказных асоб, ёсць і падзякі за стараннасць і прафесіяналізм.
Так, адзначана работа дэпутацкага корпусу – патэлефанаваўшыя грамадзяне падзяліліся, што сочаць за справамі і акцыямі, удзел у якіх прымаюць дэпутаты. Жыхары Мікалаеўскай выбарчай агругі № 16 выказалі жаданне пагутарыць непасрэдна са сваім дэпутатам Аляксандрам Палеенкам.
Жыхары вул. Гагарына райцэнтра занепакоены пустуючым участкам на вуліцы. Ён паступова зарастае кустоўем і дрэвамі, з-за чаго ўвесь выгляд псуецца. Аддзелам ЖКГ і землеўпарадкавання райвыканкама, камунальнай службе даручана вывучыць праблему і ліквідаваць яе.
Пыталіся жыхары Хойнік і аб выдзяленні сацыяльнага жылля.
Жыхарка Храпкава нагадала аб рэштках знесенага дома, якія дагэтуль не прыбралі. Таксама зададзены пытанні аб дзейнасці сацыяльнага работніка: яго якасцях, асабліва чалавечнасці, і чаму некаторыя з іх да сваіх абавязкаў ставяцца абы як.
Старшыня раённага Савета дэпутатаў Галіна Бондар сустрэлася ў межах Дня дэпутата з работнікамі РАНС. У ходзе адкрытай гутаркі размова ішла аб сацыяльна-эканамічным развіцці нашага раёна і яго перспектывах, бюджэце, падрыхтоўцы справаздачнай сесіі і Перспектыўнага плана работы райсавета дэпутатаў на 2021 год. Галіна Віктараўна заклікала ратавальнікаў унесці і свае прапановы па разглядзе пытанняў на сесіі, прэзідыуме і пастаянных камісіях райсавета.
Вольга БЕЛАШ.
Фота Алены СМУСЯНОК.
