Аб тым, якую карысць нясуць добраахвотныя дружыны, не па чутках ведаюць жыхары Судкоўскага сельсавета.
Тут першымі памочнікамі ўчастковага міліцыянера з’яўляюцца дружыннікі. На сённяшні дзень гэта шэсць чалавек. Усе яны прадстаўнікі розных узростаў і прафесій (работнікі сельвыканкама, прадстаўнікі ўстаноў адукацыі, культуры, сельгаспрадпрыемства), але галоўнае, што іх аб’ядноўвае, – жаданне зрабіць родны куток лепш і прыкласці да гэтага рэальныя намаганні. Варта адзначыць, што часта прымаюць удзел у патруляванні вуліц і дэпутаты сельскага Савета дэпутатаў.
Абавязкi ў членаў добраахвотнай дружыны падобныя на тыя, што і ў участковага інспектара. Асноўная з іх – ахова грамадскага парадку. І хаця, як кажуць мясцовыя жыхары, населеныя пункты сельсавета спакойныя і бяспечныя, парушальнікі закона тут зрэдку, але з’яўляюцца.
Дзяжурства добраахвотнай дружыны ажыццяўляецца згодна графіка два разы на месяц у вячэрні час. Асаблівая ўвага надаецца месцам адпачынку моладзі, гандлёвым кропкам – па пытанню рэалізацыі спіртных напояў непаўналетнім, а таксама аб’ектам сельгаспрадпрыемства.
Акрамя таго, дружыннікі задзейнічаны ў прафілактычнай рабоце – праводзяць гутаркі з насельніцтвам. Да прыкладу, у гэтым годзе тлумачылі важнасць нашэння святлоадбівальных элементаў у цёмны час сутак, а таксама ўдзельнічалі ў акцыі «Мак».
За 2020 год судкоўскімі дружыннікамі здзейснены 24 выхады на дзяжурства, у бягучым – 7. Летась праведзена 37 прафілактычных гутарак па прафілактыцы злачынстваў, правапарушэнняў, сямейнага недабрабыту, п’янства і алкагалізму.
Адзначу, што дружыннікі Судкоўска-га сельсавета адны з лепшых у нашым раёне. Выказваю ўдзячнасць неабыякавым жыхарам з выразнай грамадзянскай пазіцыяй, такія ініцыятыўныя людзі сапраўды заслугоўваюць лепшых слоў пахвалы.
Д. АПАНАСЮК, намеснік начальніка РАУС.
