Такога яшчэ не было. Арганізатары прыгатавалі шмат чаго эксклюзіўнага, яркага і смачнага. Гэта я пра культурна-спартыўны фестываль «Вытокі. Крок да Алімпу», на якім мне пашчасціла пабываць. Паглядзіце толькі на сакавітыя фотаздымкі адтуль!
На працягу двух дзён Рэчыца прымала гасцей. Стартавалі з праграмы прэс-тура. Журналісты рэспубліканскіх і рэгіянальных СМІ пазнаёміліся са славутымі аб’ектамі горада. Нам правялі экскурсію па краязнаўчым музеі, паказалі капліцу Еўфрасінні Полацкай на набярэжнай. А потым карэспандэнтам нават і падарункі ўручалі. Не з пустымі рукамі мы вярнуліся пасля наведвання музея «Цвік» Рэчыцкага метызнага завода. Зразумелі, з якім прэзентам селі ў аўтобус? У гаспадарцы спатрэбіцца. Але найбольшае ўражанне аказала сядзіба «Велес»: рыцарскія баі, смачная мясцовая кухня (дэгустацыя была), добры поні і вясёлыя яноты.
Больш за 20 тысяч гледачоў, цікавыя выстаўкі прадпрыемстваў і арганізацый рэгіёна, фуд-корт, майстар-класы, прысмакі Гомельшчыны, каля 30 спартыўных пляцовак, конкурс маладых выканаўцаў і брэйк-данс – гэтым і не толькі запомніўся другі дзень фестываля «Вытокі». Сярод удзельнікаў прыемна было бачыць дэлегацыю Хойнікшчыны, юных землякоў, якія прыехалі паспрабаваць сябе ў Алімпійскім квэсце. Вось, дзе кіпелі эмоцыі і стаяла вялікая чарга, прычым, да ўсіх лакацый, бо жадаючых прыняць удзел было хоць адбаўляй.
Сапраўднымі фішкамі мерапрыемства на плошчы Акцябра стала прэзентацыя калекцый адзення ад беларускіх дызайнераў «Роднае – моднае». Мы спаўна акунуліся ў незвычайную атмасферу падчас экстрымальнага спуску на парашутах байцоў МНС.
Кульмінацыяй свята стаў гала-канцэрт зорак беларускай эстрады. На пляцоўцы спявалі Тэа і Вольга Рыжыкава, Алена Ланская, Аляксандр Саладуха, Гюнэш.
На гэтым фестываль не заканчваецца. Далей «Вытокі» загляне ў Столін, Навагрудак, Горкі, Полацк і Копыль. Не ведаю, як вы, а я ўжо чакаю працягу.
Вікторыя МАРОЗ.
Фота аўтара.