Вам прывітанне ад цяляці па мянушцы Гаўруша. Некалькі тыдняў таму назад на свет яму дапамог з’явіцца ветэрынарны фельчар малочна-таварнага комплексу «Пудакоў» ААТ «Веляцін Агра» Дзяніс Чэркас.
Малады спецыяліст другі год тут працуе. І для яго кожнае выратаванае жыццё чацвераногіх падапечных – гэта не проста прафесійны абавязак, а сапраўдная місія.
«З юнацтва праяўляю любоў да жывёл. У мяне дома былі каты і сабакі. Я іх карміў, даглядаў, іншымі словамі, нёс адказнасць за тых, каго прыручыў. Так і вырашыў, што буду дапамагаць розным жывёлам. Кожны дзень на комплексе клапачуся аб здароўі сваіх падапечных. У мяне тут больш за тысячу дзвесце галоў. Ніколі не пакідаю іх без увагі. Праводжу вакцынацыю, займаюся дыягностыкай, лячэннем і прафілактыкай захворванняў. Часам прыязджаю на работу, аператыўна з усім спраўляюся і дзень праходзіць без здарэнняў. А здараецца і па-іншаму, калі трэба затрымацца ці вярнуцца на ферму пасля заканчэння дня. Бо ніхто не ведае, калі жывёле стане дрэнна, могуць быць цяжкія роды і ўначы, і падчас абеду. Для мяне галоўнае – захаванасць статка, таму заўсёды застаюся на сувязі. Праводжу агляд нованароджаных цялят і тых, хто старэйшы за дзесяць дзён. Калі выяўляю праблемнае цялятка, то адразу лячу яго. З дарослымі буронкамі таксама агульную мову находжу: прыкладаю ўсе намаганні, каб пагалоўе буйной рагатай жывёлы было здаровае», – расказвае Дзяніс Чэркас.
20-гадовы хайнічан адзначае, што прафесію выбраў сэрцам. І задаволены сваім калектывам. Тут усе разумеюць: калі нешта спачатку не атрымлівалася ў маладога спецыяліста – практыка дапаможа і ўсё потым будзе выдатна. Цяпер ветфельчар адчувае сябе ўпэўнена пры вакцынацыі, абязрожванні кароў, кастрацыі цялят. У асноўным, у земляка ўсе гісторыі, звязаныя са статкам, з пазітыўным вынікам. І ў такія моманты хлопец шчаслівы. Дарэчы, амаль уся сям’я нашага героя працуе на Хойнікшчыне ў сельскай гаспадарцы – маці загадчык фермы, бацька і брат – жывёлаводы.
«Моладзь зараз імкнецца як мага хутчэй сысці з аграрнай сферы. На жаль, многія выбіраюць вялікія гарады і больш сучасныя прафесіі. Аднак, гэта не пра мяне. Я хочу развівацца ў гэтым напрамку ў нашым раёне – паступіў завочна ў Віцебскую акадэмію ветэрынарнай медыцыны», – падзяліўся Дзяніс.
Вікторыя МАРОЗ.
Фота аўтара.
