Сёння ў аграгарадку Глінішча, на малой радзіме песняра беларускага слова – Івана Мележа – адзначылі 103 гады з дня яго нараджэння.
Гэта светлая нагода сабрала каля помніка беларускаму класіку яго землякоў, а таксама тых, хто цэніць вялікі ўклад пісьменніка ў айчынную літаратуру і Хойнікшчыну.
– Як нашчадкі выдатнай літаратурнай спадчыны, мы павінны хаця б крыху адплаціць карыснымі справамі ў гонар памяці Івана Паўлавіча, – падкрэсліла ў час свайго выступлення старшыня раённага Савета дэпутатаў Галіна Бондар. – Таму так важна, што нарэшце дзякуючы ініцыятыўнасці непасрэдных землякоў шаноўнага класіка ажыццявіцца праект «100 крокаў да Мележа». Літаратурная спадчына знаўцы палескай душы варта таго, каб перадацца і захоўвацца надалей.
На пастаяннае захоўванне ў Доме-музеі Івана Мележа Галіна Віктараўна перадала Пасведчанне ганаровага грамадзяніна Хойніцкага раёна, што прысвоена Івану Паўлавічу пасмяротна.
На мітынгу ў гонар Івана Мележа ўсклалі кветкі да помніка нашага знакамітага земляка. А пасля ўсіх прысутных запрасілі на літаратурна-музычнае свята «Мележа слова крочыць па свеце».
У Глінішчанскім Цэнтры вольнага часу прадстаўнікі культурнай галіны нашага раёна прысвячалі Івану Паўлавічу свае музычныя кампазіцыі і вершы, да прадстаўлення далучыліся і вучні мясцовай школы, якая носіць імя класіка.
Сярод гасцей і непасрэдных удзельнікаў фэста – адна з родных пісьменніка, хайнічанка Марына Шпарун, якая выказала сваю павагу Івану Паўлавічу аўтарскім вершам.
Іван Котчанка і Алеся Кірпічэнка ў ролях Васіля ды Ганны
Дарэчы, хайнічане ў той жа дзень прысутнічалі па запрашэнню ў Мазырскім драматычным тэатры імя І.П. Мележа на тэатральна-музычнай кампазіцыі да дня нараджэння класіка «Адна тысячная таго, што адчувае маё сэрца».
Алеся ЯЧЫЧЭНКА.
Фота аўтара.
