Як і кожны чалавек, І.П. Мележ вельмі любіў свой край, гэты мілы сэрцу куток, дзе нарадзіўся. А карані яго роду бяруць пачатак з-пад Прагі, дзе нарадзіўся прадзед Івана Паўлавіча Ігнацій па прозвішчу Мялешак. Ен быў высланы з Чэхіі ў Расію за вальнадумства, у войску пазнаёміўся з палешуком і прыехаў у вёску Глінішча, дзе закахаўся ў мясцовую дзяўчыну Кацярыну і ажаніўся з ёй. У сувязі з тым, што прозвішча Мялешак не было сугучна з колькасцю дзяцей, то ён выправіў яго на больш ёмістае – Мележ. У іх было дзесяць дзяцей.
Бацька І.П. Мележа Павел Фёдаравіч нарадзіўся ў 1889 годзе. Закончыў царкоўна-прыхадскую школу і паступіў у рэальнае вучылішча ў Мазыры. Праўда, вучыўся адзін год, бо памёр бацька (Фёдар Ігнацьевіч Мележ). Маці пісьменніка Марыя Дзянісаўна родам з Каранёўкі. Бацькі Івана Мележа былі прыкладам руплівасці. На ўсё Глінішча славілася спрытам ў працы маці, а бацька, акрамя працы па гаспадарцы, у полі, на лузе, рабіў яшчэ гонты, дзежкі, цэбрыкі, наймаўся ўстаўляць вокны і дзверы ў новых хатах.
У 1917 годзе ў сям’і Мележаў нарадзіўся сын Аляксандр, ён памёр у чатырохгадовым узросце. Два гады пражыў сын Уладзімір, які нарадзіўся ў 1919 годзе. У 1921 годзе на свет з’явіўся Іван Паўлавіч Мележ.
Працягваў генеалагічнае мележаўскае дрэва Іван Паўлавіч з Лідзіяй Якаўлеўнай Пятровай-Мележ. У іх у 1944 годзе нарадзілася дачка Людміла. Яна закончыла Інстытут замежных моў, працавала перакладчыцай у Інстытуце матэматыкі Акадэміі навук БССР. У сям’і Людмілы Іванаўны нарадзіліся дзве дачкі – Дар’я і Ганна. Дар’я зараз жыве ў Італіі, Ганна – у Мінску.
У 1961 годзе ў сям’і Івана Мележа нарадзілася другая дачка Ларыса. Яна з мужам –мастакі па прафесіі. У іх сям’і нарадзіўся сын Іван, зараз жыве ў Мінску, працуе дызайнерам.
У слаўнага мележаўскага роду – дастойнае прадаўжэнне.
А. ДЗМІТРЫЕНКА, настаўніца СШ №2 г. Калінкавічы.