На гэтым тыдні прайшоў доўгачаканы розыгрыш прызоў сярод падпісчыкаў раённай газеты на першае паўгоддзе. Сёлета колькасць жадаючых праверыць спадарыню Фартуну дасягнула рэкорда. Усяго 123 жыхары нашага раёна перадалі ў рэдакцыю свае квітанцыі, і кожнаму з іх мы шчыра жадалі атрымаць адзін з падарункаў.
Варта адзначыць, што самымі актыўнымі сярод працоўных калектываў сталі работнікі запаведніка і райаддзела ўнутраных спраў.
Розыгрыш прызоў адбыўся на гарадской плошчы Леніна каля галоўнага сімвала свята – навагодняй ёлачкі-прыгажуні. Напярэдадні ўсе сабраныя для гульні квітанцыі былі пранумараваны, а лічбы, якія адпавядаюць прозвішчу ўдзельніка ў створаным спісе, ставіліся на падпісны квіток і дубліраваліся асобна.
Штогод калектыў рэдакцыі праводзіць розыгрыш прызоў сярод падпісчыкаў такім спосабам, каб зрабіць гэту гульню максімальна аб’ектыўнай і справядлівай, наколькі гэта магчыма ў латэрэі. Нашы пастаянныя чытачы памятаюць, як мы запрашалі ўсіх жадаючых у рэдакцыі і ў іх прысутнасці разыгрывалі падарункі. Праводзілі розыгрыш з удзелам намесніка старшыні райвыканкама Ж.М. Чарняўскай, а яшчэ адну з латэрэй арганізавалі непасрэдна ў райвыканкаме, там нумары пераможцаў выцягвалі ўдзельнікі прэзідыума чарговай нарады.
Каму ж сёлета ўсміхнуўся поспех? На гэта пытанне нам дапамагалі адказаць хайнічане, якія па волі выпадку апынуліся паблізу ад розыгрышу. Журналісты прапанавалі прахожым дапамагчы разыграць прызы. Людзі даставалі нумаркі са спецыяльнай скарбонкі і называлі шчаслівую лічбу.
Відэа розыгрышу зараз маецца ў доступе ў інтэрнеце. Паглядзець, як праходзіла гэта мерапрыемства, можна ў сацыяльных сетках «Вконтакте» і «Одноклассники» на афіцыйных старонках раённай газеты «Хойніцкія навіны».
У конкурсе разыгрывалі 7 прызоў, пачынаючы ад неад’емнага атрыбута журналіста – запісной кнігі, да галоўнага прыза – блэндара. Гэтыя падарункі чакаюць сваіх уладальнікаў ў рэдакцыі.
Яшчэ раз дзякуем усім тым, хто прадоўжыў сваё сяброўства з раённай газетай і прыняў удзел у розыгрышы. Жадаем вам і надалей поспехаў!
Пераможцамі сталі:
Невядомскі А.В. — запісная кніжка,
Крывенчык С.В. — салодкі прыз,
Рабянок А.М. — кашпо,
Кулакоўскі А.П. — парасон,
Варабей С.І. — форма для запякання,
Жураўскі Р.П. — сярвіз,
Талюк С.П. — пагружны блэндар.
Алеся ЯЧЫЧЭНКА.
Фота аўтара і Алены СМУСЯНОК.
