У краіне з размахам адзначылі адразу два гістарычныя святы – 95 гадоў камсамола і паўстагоддзя студатрадаўскага руху. У Мінску гэтым падзеям прысвяцілі грандыёзны маладзёжны форум «Маладосць. Традыцыі. Будучыня». Аналагаў падобнага ў краіне яшчэ не было. Удзельнікамі форуму сталі больш за 700 чалавек, у ліку якіх ветэраны камсамола, былыя сакратары ЦК ВЛКСМ, вядомыя дзяржаўныя і грамадскія дзеячы БССР і СССР, прадстаўнікі сённяшняга маладога пакалення. У складзе дэлегацыі Гомельскай вобласці на маштабных мерапрыемствах пабывала першы сакратар Хойніцкага раённага камітэта грамадскага аб’яднання «БРСМ» Анастасія Ціханенка. Мы папрасілі яе падзяліцца ўражаннямі ад паездкі.
Была падрыхтавана выстава, прысвечаная развіццю маладзёжнага і студатрадаўскага руху. Прадстаўнікі добраахвотніцкіх атрадаў у гутарцы з Прэзідэнтам расказалі пра жаданне стварыць маладзёжна-патрыятычны цэнтр на базе Брэсцкай крэпасці з мэтай аб’яднання ўсіх добравольцаў краіны.
Дарэчы, у студатрадаўскім руху з’явіліся новыя накірункі. Напрыклад, сервісныя атрады праваднікоў, якія ў летні перыяд абслугоўвалі пасажыраў цягнікоў. Свае навыкі яны прадэманстравалі і Аляксандру Рыгоравічу, падаўшы яму чай у імправізаваным купэ.
Напэўна, найлепшая сувязь часоў і пакаленняў выявілася ў той момант, калі беларускаму лідару нечакана для яго ўручылі нумар маладзёжнай газеты «Знамя юности», які датаваны 1972 годам. Там у адным з артыкулаў гаворыцца пра дзейнасць Аляксандра Рыгоравіча Лукашэнкі ў складзе студэнцкага атрада.
Да таго ж, Прэзідэнт узгадаў праект БРСМ «100 ідэй для Беларусі» і даручыў Акадэміі навук і Ураду адабраць з дзесятак самых перспектыўных ініцыятыў, якія можна пачаць рэалізоўваць у самы бліжэйшы час.
Для ўдзельнікаў і гасцей форуму была падрыхтавана канцэртная праграма з удзелам артыстаў беларускай эстрады.
А яшчэ на плошчы Дзяржаўнага Сцяга адбылося закрыццё трэцяга працоўнага семестра і ўшаноўванне лепшых студэнцкіх атрадаў. Вызначаныя ў дзевяці намінацыях пераможцы атрымалі граматы і прызы.
Я рада была сустрэцца са сваімі калегамі, пагутарыць, падвесці вынікі работы нашага грамадскага аб’яднання, абазначыць планы на будучыню. Цяпер мы з новымі сіламі будзем працаваць на дабрабыт нашай краіны.
Запісала Наталля ЧЭКАН.