5 верасня Дом абрадаў адзначыў 10-гадовы юбілей.
Першае ўрачыстае вяселле другога дзесяцігоддзя прайшло на мінулым тыдні.
Начальнік аддзела ЗАГС райвыканкама Таццяна Пахомава арганізавала для Аляксандра і Анастасіі Тамілка, іх гасцей сапраўднае свята, якое стала неспадзяваным сюрпрызам для ўсіх. Самадзейныя артысты правялі для маладажонаў абрад, выканалі вясельныя песні.
Старшыня раённага Савета дэпутатаў Галіна Бондар і першы сакратар РК ГА «БРСМ» Людміла Гаркуша павіншавалі са шлюбам маладых. Пажадалі жыць у шчасці і згодзе ўсё жыццё, а любыя праблемы вырашаць толькі разам, прыслухоўваючыся адзін да аднаго.
Каб багатым і добрым было сямейнае жыццё артысты абсыпалі маладажонаў зернем, звязвалі іх вясельным поясам у знак доўгага кахання.
Удзельніца аматарскага аб’яднання «Спадчына» казала вось так:
– Сыплю пшаніцу яру,
Каб жылі маладыя ў пары,
Сыплю на вас зярно,
Каб вы былі як адно,
А маладому яшчэ ў кішэню зярнятак,
Каб было многа дзіцятак.
Віншуем вас, Аляксандр і Анастасія! Няхай у вашым доме заўсёды пануе каханне, павага і давер.
Вікторыя МАРОЗ.
Фота аўтара.
