Даўно мінулі тыя часы, калі, не задумваючыся, трацілі прыродныя багацці, ваду, электраэнергію. Цяпер кожны гаспадарлівы чалавек (і не толькі) задумваецца над тым, колькі заплаціць за тую або іншую паслугу і ці можна на нечым з’эканоміць. Энергазберажэнне стала адной з галоўных задач на дзяржаўным узроўні, тым больш пры сусветным эканамічным крызісе. Аб тым, як вырашаюцца пытанні эканомііі і беражлівасці на ПУП “Палескія сыры”, размова з галоўным энергетыкам прадпрыемства С.Д. ДЗЕМЧАНКАМ.
– Сяргей Дзмітрыевіч, раскажыце, калі ласка, што ўяўляе праграма энергазберажэння на прадпрыемстве?
– У назве Дырэктывы №3 Прэзідэнта Рэспублікі Беларусь ад 14.07.2007г. увесь сэнс пытання: “Эканомія і беражлівасць – галоўныя фактары эканамічнай бяспекі дзяржавы”. Іншымі словамі кажучы, усе павінны эканоміць энергарэсурсы, каб заставацца незалежнымі. У нас распрацоўваецца план арганізацыйна-тэхнічных мерапрыемстваў па эканоміі цеплаэнергарэсурсаў на кожны год. У ім указваюцца чакаемы эканамічны эфект і тэрмін акупнасці новага абсталявання. Эканамічны эфект вымяраецца ў тонах умоўнага паліва ў год. Кілават-гадзіны, метры кубічныя – усё пераводзіцца ў адны адзінкі, каб было зручна падлічваць, параўноўваць.
– Што ўжо выканана з запланаванага?
– Рэканструяваны кампрэсарны вузел на аміячна-халадзільнай устаноўцы і заменены састарэлыя кампрэсары на новыя. Замена лініі па вытворчасці казеіну з-за фінансавых праблем часова прыпынена. Фінансаванне пераведзена на іншыя мэты – будзем устанаўліваць новы кацёл, рэканструяваць кацельню. Новы энергазберагаючы кацёл дазволіць эканоміць прыродны газ, што таксама адпавядае праграме энергазберажэння. Заменена сеткавая помпа, правялі яе выпрабаванні. Устанавілі рэгулюемы прывад на сілкавальную помпу ў кацельні і са жніўня ўжо атрымліваем эканамічны эфект. Замена незагружанага катла ДКВР-10/13 на кацёл меншай магутнасці перанесена на наступны год.
– Гэта што датычыць вытворчых памяшканняў. А як у службовых, дапаможных?
– Энергазберагаючыя лямпачкі зараз ва ўсіх кабінетах. Лямпы напальвання практычна не выкарыстоўваюцца. Энергазберагаючая ў 20 ват свеціць як 100 ват, эканомія складае 80 працэнтаў. Хаця яны ў некалькі разоў даражэй, але акупляюцца прыкладна за 6 месяцаў.
Устаноўлена на заводзе аўтаматычная сістэма ўліку электраэнергіі: фіксуюцца паказанні расходу электраэнергіі на бягучы час. З дапамогай гэтай сістэмы на сваім камп’ютэры магу кантраляваць узровень спажываемай электраэнергіі.
Для патрэб работнікаў на адміністрацыйным паверсе і ў кожным цэху ўстанавілі кулеры з чыстай халоднай і гарачай вадой.
Лічу, што на людзях эканоміць нельга. Трэба ўкараняць новае энергазберагаючае абсталяванне. Што і будзе прадугледжана ў плане арганізацыйна-тэхнічных мерапрыемстваў па эканоміі цеплаэнергарэсурсаў на наступны год, які будзе распрацоўвацца ў лістападзе.
Гутарыла Вольга БЕЛАШ.
